حكاية محسن أفندى ...!!

[aiman 2005]

أود أن انوه بأن هذه القصه مستوحاه من وحى خيالى ، ومن بنات أفكارى ، كتبتها دون أية اعداد مسبق ، واستلهمت احداثها مما قد يدور داخل البيت المصرى ، و فى الشارع المصرى البسيط من احداث يوميه معتاده، ارجوا ان تنال رضاكم وتحوز على اعجابكم ، وسأبدأ بسرد أحداث الفصل الاول ، فاذا ما استشعرت رضاكم عنها ، واصلت عرض فصولها الاخرى ، وانى لمنتظر تعليقكم
حكاية محسن أفندى

الفصل الاول

الاستاذ محسن جارى العزيز يعمل بوظيفة حكومية بسيطه ذات دخل محدود، لا يكاد يكفى احتياجات الاسرة الاساسية ، ولكى يزيد من موارد اسرته ، فأنه يعمل مساءا باحدى المحلات التجاريه - السوبر ماركت - القريبه من منزله .
وذات يوما من ايام الصيف الخانقه ، رجع من عمله ووجهه يتصبب عرقا وقد بدت عليه أثار الشمس الحارقة 0
بادرته زوجته المصون السيدة عواطف قائله : يا محسن ما تنساش تجيب التموين الليلادى لأن الزيت خلص ومش عارفه بكره هقلى البطاطس بايه ؟!!
السيد محسن : حاضر أن شاء الله .
السيده عواطف : انت رايح المحل النهارده ؟
محسن : ان شاء الله .
عواطف : طيب حاول ترجع بدرى ، علشان سناء بنت خالتى ولدت وعايزة اروح ابارك لها ، انا ما نقتهاش ساعة فرحها .
محسن : طب وانا ارجع بدرى ليه ، انا ايه علاقتى باللى ولدت .
عواطف : يعنى هاروح وحدى ، :yst7lf: ولما جوزها يسأل عليك ابقى أقول له ايه ؟!
محسن ما تقلولوش حاجه ، ابقى قوليله جوزى بيكد ويشقى :yrfd: علشان يوفر لقمة العيش للعيال .
عواطف ( بتهكم وسخريه ) لقمة العيش ولا لقمة القاضى ، اللى يسمع الكلام ده يقول انك مبغددنا ،ده كلهم مائه و خمسين ملطوش عمى اللى بتاخدهم من المحل..!!
محسن : طيب لمى يومك وخللى ليلتك تعدى على خير .
عواطف :حوش يا حواش وان ما لمتش يومى هتعمل ايه ؟!
محسن : انت هتوجعى دماغى ليه ، انا سايبلك البيت مخدر .
يفتح محسن الباب وقبل ان يرزعه بشده فتنكسر الشراعه ، طفل صغير يصرخ : بابا بابا رايح فين يا بابا؟
محسن وهو يرزع الباب : رايح فى ستين داهيه !!
الطفل : طيب ما تنساش تحمللى فيفا الفين وسبعه من السيبرعلى الفلاشه !!
محسن : جاتكو ستين نيله...!!
وما أن ينتهى محسن من نزول السلم ، حتى تجرى عواطف على التليفون ، وتتصل بوالدتها وهى تولول ، الحقينى يا ماما :yrfd:، المنيل نزل من غير ما يسبلى فلوس علشان أبارك لسناء.
الام : أخص عليه ، هو مش فاكر لما ولدتى مصطفى ، مش سناء جاتلك ورمت فى حجرك عشرين جنيه ،،ساعة ما جبتيلنا بيها عيش فينو ولانشون وجبنه رومى وقعدنا نتعشى معاكم، هوأيه نسى خلاص.. اما صحيح قليل أصل ..!!
عواطف : يا ماما مش وقته الكلام ده ، انا مش عارفه اعمل ايه فى المصيبة دى دلوقتى هجيب فلوس منين علشان أنقط سناء ؟
الام : مش عارفه ، حاجه تحير أكيد أمه وزاه ، ما هو جوز سناء يبقى ابن عمتها وأكيد عرفت منه ان سناء ولدت .
اقولك ... استنى لما اشوف ابوكى ؟!
الام موجهه كلامها للأب الجالس يقرأ فى احدى الجرائد القديمه : معاك فلوس علشان عواطف تبارك لسناء ؟
الاب : سناء مين ؟
الام : سناء بنت خالتها
الأب : ما لها سناء؟
الام : انت ما عرفتش مش سناء ولدت ؟
الأب : يا دى المصيبه ، هى سناء دى مش لسه والده ، و مباركين لها من حوالى اربعة شهور، لما أخدتنى منى عشرين جنيه ورحتيلها ، هى ايه ارنبه :yd7k: !!
الام ضاحكه : ايه جتك ايه دى مش سناء دى اختها سعاد ، انت يا راجل بقيت بتنسى ولا ايه؟! .
اثناء الحوار الدائر بين الاب والام ، لا زالت عواطف على سماعة التليفون تردد آلو... آلو ، ولكن لا حياة لمن تنادى.
فجأة يدق جرس الباب ، عواطف : افتح يا مصطفى الباب
يقوم مصطفى من امام شاشة الكمبيوترقائلا : يوه بأه :yrfd:هو مفيش حد فى البيت ده غيرى؟!!
يفتح مصطفى الباب فيجد جارتهم الست عنايات ، يدور بينهما الحوار التالى:
الست عنايات : امك فين يا مصطفى؟
مصطفى : بتكلم تيته فى التليفون
صوت الام ياتى من بعيد : مين ياواد يا مصطفى؟
مصطفى : دى تانت عنايات يا ماما
الام : انا جايه حالا اتفضلى يا عنايات ، تترك الام سماعة التليفون والخط معلق ، وتذهب لبدايه حديث جديد مع الجارة الست عنايات ، وطبعا لن يخلو الحديث عن عمايل ابو مصطفى السوده ، بعد ما تتفرج على الكام كومبليزون :3mla: اللى جابتهم عنايات من الموسكى فى اسبوع الفضل النهارده ...الخ ..!!

****************
السؤال هنا :
1- كم سيدفع السيد محسن :yrfd: قيمة فاتورة التليفون عن المدة الحاليه ؟
2- هذا السيناريو وما شابهه ، كم يتكرر فى بيوتنا فى عصرنا الحالى :yd7k:؟
3- هل سينجح محسن فى تحميل فيفا الفين وسبعه لمصطفى فى هذا اليوم العاصف ، واذا لم يستطع بدعوى أن الفلاشه مفيرسه ما ذا تتوقع أن يكون رد فعل مصطفى تجاه ابيه :yrfd: ؟!!
4- اذا كانت الست عنايات اشترت التلات كومبلوزونات بعشرين جنيه:3mla: ، فى اسبوع الفضل ، بنسبه خصم 40 % ، فكم يكون ثمن الكومبيليزون الواحد قبل الخصم
؟

*************


دمتم بألف خير و سعاده ...!!

[aiman 2005]

حكاية محسن أفندى

الفصل الثانى

وصلنا لغايه لما عواطف بدأت الحوار مع جارتها العزيزة الست عنايات ، لكن معرفناش الاستاذ محسن عمل ايه بعد ما رزع الباب ونزل جرى على السلم ، اقولك يا سيدى اللى حصل :
بمجرد ما محسن خلص السلم وخرج من باب البيت وهو يسب ويلعن اليوم ..!! هب اتشنكل فى غطاء البلاعه اللى موجوده امام باب البيت ، وكاد أن يقع على الارض .
الست ام رمضان اللى فارشه جنب الباب بتبيع الجرجير والخضره ضاحكه : اسم الله عليك يابنى :yd7k:، ما قلنالكو تلموا من بعض وتغيروا الغطا ده ، انتم مش خايفين على عيالكوا ..!!
محسن ينظر اليها ، ولا يتكلم ويستمر فى طريقه مهرولا ، بعد ما يخلص محسن الشارع ويطلع على الميدان ، محسن يحدث نفسه : والله مانا عارف أروح فين دلوقتى :nam:، لسه بدرى على ميعاد المحل ؟ الله يجازيكى يا شيخه ..!
رجل محسن تاخده على قهوة مكتوب عليها ( بورصة الامانة لصاحبها الحاج منصور الخشن ) وبمجرد ما يقعد على الكرسى ييجى الصبى ( القهوجى ) ويبدأ الحوار
القهوجى : تشرب أيه يا استاذ
محسن : شويه
القهوجى : شوية ايه ؟ الماتش هيبتدى ومش هنبقى فاضيين ..!
محسن : هو فى ماتش النهارده ؟
القهوجى : أيوه
محسن : ماتش مين ؟
القهوجى : ماتش الاهلى والفريق الافريقى
محسن بينه وبين نفسه .. كويس اهى حاجه تسلينا لغايه ميعاد المحل ..!!
محسن : طب روح حطللى كرسى فى الصف الاول قدام التلفزيون .
القهوجى : طب ها تشرب ايه ؟
محسن : هات لى شاى
القهوجى : ماشى
واثناء ذهاب القهوجى لاحضار الشاى ، محسن ينده عليه ويدور الحوار التالى
محسن بقولك ايه : عندك بقسماط صوابع .
القهوجى : نعمين .
محسن : طازه ؟
القهوجى : أى نعم .
محسن : طب ابقى هات لى كيس مع الشاى
القهوجى : ماشى .
القهوجى منصرفا : وعندك واحد عروسه على ميه بيضه ومعاه كيس قراقيش ..!!
القهوجى بعد ما يجيب الشاى ، سيادتك هتقعد فين ؟
محسن : ما قلت لك هقعد قدام التلفزيون .
القهوجى : قدام التلفزيون يمين ولا شمال ؟
محسن : يعنى ايه يمين ولا شمال ، قدام التلفزيون وخلاص ، هتفرق ايه ؟!
القهوجى : انت بتشجع ايه ؟
محسن : انا اهلاوى
القهوجى : يبقى تقعد يمين .
محسن : ليه ومين اللى هيقعد شمال ؟
القهوجى : اللى بيشجع الفريق الافريقى .
محسن : هو فيه سياح جايين يشجعوا الفريق الافريقى هنا ؟
القهوجى : الزملكاويه :yrfd: .!!.
محسن : أه..!!
تمتلئ القهوة عن آخرها وتتعالى الصيحات ما بين مشجع للنادى الاهلى ومشجع للفريق الضيف ، ولا يخلو الامر من تهديدات من المعلم منصور الخشن بغلق التلفزيون اذا لم تلتزم الجماهير بالروح الرياضية ومبادئ القهوه العريقة وتعاليمها السامية :yd7k: . .!!
وما أن ينتهى الشوط الاول حتى يتعالى صوت القهوجى : المشاريب يا أفنديه
احد الجالسين : مشاريب أيه ؟ ما شربنا خلاص ، هى شغلانه ؟! مش كفايه الماتش الزباله ده ؟
القهوجى : يا أفنديه كل شوط بمشروب ، نظام القهوة كده
المشاهد : يا سلام ، ولوكان الماتش فيه اكسرا تايم او ضربات جزاء ، يبقى كل واحد هيبلبعله صندوق حاجه ساقعه ، هيه ايه العباره استغلال ولا أيه ؟ :yst7lf:.. ألخ..!!.
وما بين تمتمات وهمسات الجالسين واعتراضهم ايضا ، يقرر محسن الانسحاب ، قبل ما يدفع ثمن مشروب تانى والعمليه مش متحمله ، خصوصا و ان الماتش يقرف ..!!
القهوجى : رايح فين يا استاذ .
محسن : ماشى عندك مانع ؟
القهوجى : دفعت الحساب ؟
محسن : طبعا ، يعنى هامشى من غير ما ادفع؟!!
واثناء خروج محسن من القهوه
المعلم منصور : يا واد يا شنكل
شنكل : نعم يا قياده
المعلم : الافندى اللى ماشى ده دفع الحساب ؟
شنكل : حصل يا قياده
المعلم مرتابا : هو كان طالب ايه ؟
شنكل : عروسه وصوابع يا قياده
المعلم : و الشوط التانى ؟!
شنكل : الشوط التانى لسه ما ابتداش يا قياده ..
يخرج محسن من القهوة ولا يجد بدا من الذهاب الى المحل بدرى شويتين مش اشكال يمكن الراجل يصرفله اوفر تايم ولا حاجه ،
يمضى محسن ليلته فى المحل بين بعض المصطلحات التى ملت ودانه من سماعها ( ربع قديم - تمن لانشون - ربع كلامالا - صابونه بريحه ... الخ . حتى يأتى موعد الانصراف .
وفى طريقه للعوده الى المنزل , يجد محسن السيبر فاتح . محسن محدثا نفسه : كويس السيبر فاتح لغاية دلوقتى ، لما ادخل أحمل اللعبه لمصطفى ،يدخل محسن السيبر ويبدء الحوار التالى :
محسن : السلام عليكم
الشاب الجالس : وعليكم السلام ، اتفضل يا عم محسن
محسن : ازيك يا حماده وازى ابوك ؟
حماده : بخير والله
محسن : عندك فيفا الفين وسبعه ؟
حماده : مش عارف , استنى لما اسأل:
ينده حماده على علاء الجالس بغرفة الصيانه المركزيه بالسيبر و - المكتوب على بابها ممنوع الدخول -:yd7k: ..!! يا علاء عندك فيفا الفين وسبعه ؟ ، يمر زمنا كالدهر على الاستاذ محسن خوفا من الاجابه بالنفى ! ، واخيرا يرد علاء من الداخل : أيوه
حماده : طيب خد الفلاشه من عم محسن وحملها له ، يخرج علاء وياخذ الفلاشه ويدخل الى الغرفة ، وقبل ما يبدء عملية التحميل ، حماده يصرخ بصوت عال : استنى يا علاء ، وينظر الى محسن قائلا : أوعى تكون الفلاشه مفيرسه يا عم محسن ؟!!.
محسن متنفسا الصعداء : عيب يا حماده انا مش تلميذ ده انا مسطب اقوى انتى فايرس وعامله آبديت من عالنت .
حماده : طيب اتفضل اقعد لغاية ما علاء يخلص ، ،تشرب ايه يا عم محسن ؟
محسن : شكرا يا حماده لسه شارب .
حماده : وازاى مصطفى ؟
محسن : بخير والحمد لله .
حماده : يعنى مش باين ؟
محسن : المذاكره بقى ، الامتحانات على الابواب .
حماده : ربنا يساعده ، هو فى سنه كام دلوقتى ؟
محسن : يفكر قليلا قبل أن يتمكن من الاجابه ، فى سنه ثالثه ، وثالثه دلوقتى بقت شهاده - لاحظ أن محسن يردد ما يسمعه من خلال حوارات عواطف التليفونيه فقط -:yd7k: ، ولا يعلم يقينا اذا كانت سنه ثالثه اصبحت فعلا شهاده ..!!
حماده : ربنا معاه
يخرج علاء من غرفة الصيانه ويعطى الفلاشه لعمه محسن قائلا كله تمام يا عم محسن ،يشكر محسن علاء ويسأل : حماده كام الحساب يا حماده ؟
حماده : حساب ايه يا عم ابو مصطفى ، عيب الكلام ده ، الحساب يوم الحساب ، ابقى سلم لى على مصطفى .
يخرج محسن من السيبر مسرعا وهو يردد الف شكر , متمنيا أن يرجع البيت قبل أن ينام مصطفى .
بمجرد أن يصل محسن اللى باب الشقه يتذكر خناقة الظهيرة مع عواطف ، يفتح محسن الباب فيجد عواطف جالسه امام التلفزيون ، يدور الحوار التالى :
محسن : السلام عليكم
عواطف : وعليكم السلام
محسن : ازيك يا عواطف
عواطف ( متدلله ) :mlak:الحمد لله
محسن : امال فين الواد درش ؟
عواطف : اتعشى ودخل ينام
محسن : خساره انا حملتله اللعبه اللى عايزها ، كان نفسى يشوفها قبل ما ينام ..!
تنظر عواطف الى محسن ولا تعلق ، فى الوقت الذى يدخل محسن غرفة نوم مصطفى لعله ما زال مستيقظا ، فيجده مستغرقا فى النوم ، يطبع محسن قبله على وجنه مصطفى الرقيقه ويترك الفلاشة بجوار السرير لعلها تكون أول ما يراها عندما يستيقظ صباحا .
يدخل محسن غرفته ويبدء فى خلع ملابسه وارتداء ملابسه المنزليه ، يخرج من الغرفه سائلا عواطف : فين بنطلون البيجامه ؟
عواطف : اتغسل طلع واحد غيره ..!
يرحع محسن الى غرفة النوم
عواطف : مش ها تتعشى ؟
محسن : فى أيه ؟
عواطف : اعملك جبنه بالطماطم ؟ والا اسلقلك بيضه ؟
محسن : لأ ، اعمليلى ساندوتشات جبنه بالطماطم
يسحب محسن الكوفرته و المخده الصغيره ويفرشها فى البلكونه ، فى الوقت الذى تأتى فيه عواطف بالسندوتشات ، وتجلس جواره فى البلكونه .
عواطف : مش هتبطل عادة النوم فى البلكونه دى ، الجو بيبرد بالليل والشمس تطلع عليك الصبح ... الخ ..!!
يتناول محسن العشاء صامتا وهو يفكر فى مدى السعادة التى ستنتاب مصطفى عندما يجد الفلاشه فى الصباح ، وبعد ان يستغرق محسن فى النوم يأتيه صوت عواطف عاليا من داخل الحجرة:
يا محسن : انت ما جبتش التموين ليه ؟
محسن بينه وبين نفسه : :nam: والله ما نا رادد ..!!
عواطف : طيب ابقوا شوفوا بكره هنقلى البطاطس بأيه ؟
يستغرق محسن فى نوم وثبات عميق حتى تسطع الشمس على وجهه الكريم ..!!

دمتم بألف خير...!!

[aiman 2005]

حكاية محسن أفندى
الفصل الثالث

ما أن صبح الصباح و سطعت الشمس على وجه اخونا الاستاذ محسن , الا ووصل الى اذنيه صوت زوجته السيدة عواطف من داخل حجرة النوم : قوم يا محسن النهار طلع انت مش رايح الشغل ولا أيه ؟!، الساعه داخله على سبعه ونص ..الخ !!
لم يجد محسن مفرا للهروب من حرارة الشمس:nam: ومن صوت عواطف المزعج الا الاستيقاظ .!
محسن يدخل من البلكونة يجد عواطف شبه نائمه على السرير .
محسن : صباح الخير
عواطف : صباح النور ، انا مش عارفه ايه غيتك فى النوم فى البلكونه انت ما بتبردش ؟! ،:3mla: مش خايف برص يمشى على وشك وانت نايم ؟!!!
محسن وهو يسحب الفوطه : فين الشبشب ؟! ( برص ) صحيح الملافظ سعد !!
عواطف : يمكن خلعته فى البلكونه ؟
محسن يرجع للبلكونه ويبحث عن الشبشب تحت الكوفيرته ويدخل الحجرة مرة أخرى ،
محسن : مش فى البلكونه ؟ .
عواطف : شوفه جنب باب الحمام ؟ .
محسن يخرج من الحجرة وقبل أن يتجه الى الحمام . يتذكرموضوع الفلاشه فيذهب مسرعا الى حجرة مصطفى , لا يجد مصطفى علىالسرير , يرجع الى باب حجرة النوم متسائلا : هو مصطفى راح المدرسة ؟
عواطف وهى لا زالت نائمه بالفراش ترد متكاسله : أيوة
محسن : خد الفلاشة ؟
عواطف : مش عارفة .
محسن : قولتى له بابا حملك اللعبه ؟
عواطف : ايوه .
محسن : قال لك أيه ؟
عواطف : ما ردش ...!!
محسن : طيب قومى اعملى لى كباية شاى .
عواطف وهى نازلة من على السرير ولا زالت متكاسله : مش هتفطر ؟
محسن : لأ هاكل تحت .
عواطف : أنا عارفه ايه اللى بيعجبك فى رمرمة الشارع ؟!
محسن يعمل مش سامع كلمة ( رمرمه ..!! ) و يدخل الحمام بعد ان يجد الشبشب بجوار باب الحمام كما توقعت عواطف تماما ، وبعد خروجه يصلى ركعتين الصبح ويشرع فى ارتداء ملابسه وهو يشرب الشاى ، محسن محدثا نفسه : تسلم ايدك يا عواطف والله ما حدش يعرف يعمل الشاى ده زيك :mlak:.!
وبعد أن ينتهى محسن من ارتداء ملابسه ، ويتجه الى باب الشقه ، ينده على عواطف :
أنا نازل يا عواطف مش عايزه حاجه ، يأتيه صوت عواطف عاليا من داخل الحمام : لأ ... على فكره انا هنزل اروح لماما شويه ويمكن نروح نبارك لسعاد .
محسن : طيب فيه عشرين جنيه فى الكمودينو ابقى خديها ، فى هذه اللحظه تشد عواطف السيفون .:yd7k: ويتمنى محسن لو أن صوت السيفون قد منع عواطف من الاستماع الى موضوع العشرين جنيه :yd7k:..!!
تخرج عواطف من الحمام ، وتفرش المصلية وتكبر، و قبل أن تبدأ فى صلاة الصبح تتذكرموضوع الزيت و التموين ، عواطف محدثه نفسها : يادى الحوسه نسيت اقول له على التموين ، طيب يشوفوا بقى هنقلى البطاطس بايه النهارده ؟!! عواطف ترفع يدها مكبرة وتبدأ فى صلاة الصبح .
هذه ابله عواطف ، اما عن عمنا الاستاذ محسن فبمجرد خروجه من باب الشقه وتمنياته لو كان صوت السيفون قد منع وصول حوار العشرين جنيه الى اذان السيده حرمة ، ينزل محسن السلم كعادته مسرعا وكعادته ايضا يتكعبل فى غطاء البلاعة ، الخاله ام رمضان تضحك وترسم علامات الفزع على وجهها : أسم الله عليك يا بنى ، مش قولنالكم تلموا من بعض وتغيروا غطاء البلاعة ده ، أنتم أيه ما بتخافوش على ولادكم ؟!
محسن ينظر اليها وكعادته برضه ما يردش، ويبدأ مشواره اليومى بالذهاب الى عربة الفول بتاعت عم محمود،:nam: وقد التف حولها العديد من ابناء الحى ليتناولوا افطارهم قبل الذهاب الى اعمالهم .
محسن : سلام عليكم
الساده الحضور الملتفين حول العربه : وعليكم السلام ( لاحظ أن محسن يتناول فطارة يوميا على عربة عم محمود منذ أن كان فى مدرسة شبرا الاعداديه ).
أحد الحاضرين اثناء التهامه لطبق الفول و البصل الاخضرالمعتبر بتاع عم محمود : ما فيش اخبار عن العلاوة يا استاذ خليل ؟ ( الاستاذ خليل نعيم أكبر الموجودين حول العربيه ) .
الاستاذ خليل وفى يده الجريده اليوميه : والله مانا عارف اهى الناس بتتكلم وخلاص ، اللى بيقول عشره الميه والللى بيقول عشرين الميه ، لغاية دلوقتى مفيش حاجه باينه .
احد الواقفين ::yst7lf: والله انا شايف ان الحكومة ما تديناش علاوة بس ما تزودش الاسعار:yrfd:، الدنيا بقت نار، ولا ايه يا استاذ محسن ؟
محسن : أه ، هو الاهلى عمل ايه امبارح ؟
الاستاذ خليل : كسب واحد صفر ، ليه انت ماشفتش الماتش يا سى محسن ؟ غريبه دى ...!!
محسن : لا والله شفت الشوط الاول بس وبعدين رحت واجب عزاء ..
أحد الواقفين : البقاء لله .
عم محمود بتاع الفول : مين يا استاذ محسن كفانا الشر ؟
محسن : لا ده قريب ابو ام مصطفى ، أحد الواقفين أيضا : البقاء لله يا استاذ محسن ، انا مش عارف الناس مأبده و ماسكه فيها ليه ؟:yrfd: الدنيا بقت تقرف وما لهاش طعم ...!!
يرد آخر : هو مين اللى جاب جون الاهلى ؟
الاستاذ خليل : عماد متعب .( لاحظ أن الاستاذ خليل دائما يسارع بالرد وكأنه هو الوحيد اللى شاف الماتش ..! )
وبعد ان ينتهى محسن من الافطار ويدفع الحساب لعم محمود ويودع الحاضرين ، يتجه الى محطة الاتوبيس للذهاب الى مقر عمله فى وسط البلد .

****************
ماذا حدث مع الاستاذ محسن فى هذا اليوم ..... هذا أمر شرحه يطول ... و أنا الليلة مشغول ..!!

[aiman 2005]

حكاية محسن أفندى
الفصل الرابع

سيبك من الاستاذ محسن دلوقتى وخلينا مع الست عواطف ...!!، بمجرد أن انتهت عواطف من أداء صلاة الصبح ، قامت من على سجادة الصلاة و انطلقت بسرعه البراق الى درج الكومدينو وما أن فتحته ووجدت العشرين جنيها قابعه بداخله مختبأه ( بفعل فاعل ) تحت بعض قطع الاوراق الا وتنفست الصعداء:yd7k: ، وابتسمت وقالت اهو محسن كده يطلع يطلع و بعدين ينزل على ما فيش ، وما أن أحكمت قبضتها على العشرين جنيها الا وشعرت بنشوة غريبه تجرى فى جسدها ، وفجأة يدق جرس الموبايل بتاع عواطف معلنا وصول رساله ( كلمنى شكرا المجانية ) ، وطبعا عواطف عارفه مين اللى باعته الرساله ..!!، وبدون أن تنظر الى شاشة الموبايل ، تتجه الى التليفون مباشرة وتتصل بوالدتها ويبدأ الحوار اليومى كالآتى :
عواطف : صباح الخير يا مامتى يا حببتى ، ازيك يا نونه ، وازى جوزك العزيز اللذيذ عبد العزيز .:yd7k:.!!
نونه : أش أش ، أيه السعاده و الرضا اللى احنا فيه ده ؟ اللهم أجعله خير ..!!
عواطف : أوه يا مامتى ، يعنى مش عاجبه وانا زعلانه ولا وانا فرحانه ؟!!
نونه : ربنا يسعد ايامك يا بنتى ، هو جوزك نزل ( لاحظ ان الست نونه تعلم ميعاد نزول أخونا محسن بالثانيه , ولا يمكن تدى لعواطف المزد اليومى المعتاد الا وهى متأكده تماما من خروجه ) ..!!
عواطف : ايوه يا مامتى ، بقولك ايه انت ناويه تروحى لسناء امتى ؟ ممكن نروح النهارده ؟
نونه : مش عارفه ، أصل أبوكى نزل يقبض المعاش ، وما سابليش فلوس ..!!
عواطف : ولا يهمك يا مامتى ، انا معايا فلوس .
نونه : قولى كده ، وانا اقول هى البنت مظأططه ليه ، اتارى ده السبب ، هو محسن اداكى فلوس ؟!!
عواطف : طبعا هو يقدر ، مانتى عرفاه يطلع .. يطلع .. وبعدين بينزل على ما فيش ..!! ، اسكتى يا ماما أما البت عنايات جارتنا نزلت الموسكى وجابت شويه كمبلوزونات انما ايه وبسعر التراب ..!! تصورى بنت الايه جايبه التلاته بعشرين جنيه .
نونه : عنايات دى واعيه موت ، بس بصراحه انا ما بحبش عينها :mll:، فاكره لما ورتيلها الشورت بتاع مصطفى اللى كنت جايبهوله على العيد ، اول ما نزل بيه يوم العيد رجع بيه متقطع ستين حته ...!! ولا .. ألخ ..!
عواطف : يا ماما انا هرتب الشقه بسرعه واقشر البطاطس و أقطعها ، بس والله مش عارفه هقليها بأيه ، محسن نسى يجيب التموين ...!!
نونه : ولا يهمك ابقى خدى ازازة من عندى وابقى رديها لما جوزك يجيب التموين ..!
عواطف : ان شالله يخليكى يا مامتى ، نص ساعه وهاكون عندك ، يلا باى ..!!
بعد ان تنتهى عواطف من مكالمة والدتها الصباحيه ،تفتح الراديو وتقول لما أسمع اخبار خفيفه يمكن يجيبوا حاجه عن العلاوة ، ربنا يوسع عليك يا محسن ، المعايش اصبحت صعبه ؟؟!!
( لاحظ ان عواطف بتتكلم شهريا بالتليفون مع الست والدتها بس، بما يعادل مائه وخمسون جنيها، ومع ورود كل فاتورة تليفون تبدأ خناقه التليفون الشهريه وينحصر سيناريو هذه الخناقه على ثلاثه محاور رئيسيه ، المحور الاول : عواطف تنفى بشده أن تكون هى السبب الرئيسي لأرتفاع قيمة فاتورة التليفون وترجع السبب فى ذلك الى جشع الحكومة والشركة :nam:..!! .
المحور الثانى : محسن يؤكد أنه سوف يلغى التليفون ، أو يعمله خدمة الاستقبال فقط أسوة بالآخرين ، وطبعا معروف لدى الجميع من المقصود بالآخرين:yst7lf: .
المحور الثالث : مصطفى قابع امام شاشه الكمبيوتر ، ويقول بهدوء وهو غير مكترث بما يحدث من حوارات اثناء الخناقه المعتاده : وطوا صوتكم شويه الجيران تسمع ، انا مره شفت تانت عنايات فاتحه الباب وبتتصنت عليكم :yrfd:...!!
وتنتهى الخناقه ، ويبقى الوضع على ما هو عليه ، لا عواطف هتخف شويه من مكالماتها التليفونيه اليوميه ، ولا الاستاذ محسن هيخلى التليفون استقبال بس لاته مستعيبها ، ويحدث نفسه قائلا انا لو خليت التليفون استقبال الناس هتقول على عواطف ايه؟!!
المهم ، الست عواطف بتدعى لمحسن بسعة الرزق ، ولا تحمل نفسها جهد ترشيد المكالمات التليفونه ...!! وتبدأ فى ترتيب الشقه ، فتدخل البلكونه لاحضار الكوفيرته و المخده الصغيره ، تلمح الست عنايات فى البلكونه , وفورا يبدأ الحوار اليومى :
عواطف : صباح الخير يا عنايات
عنايات : صباح الخير يا عواطف بنت حلال ، انا لسه كنت هنده عليكى دلوقت ، فاضية تنزلى معايا وسط البلد النهارده ، بيقولوا التوحيد و النور عامل تخفيضات انما ايه ؟!
عواطف : لأ مش هقدر يا حبيبتى ، اصل محسن لما عرف ان سناء بنت خالتى ولدت حلف عليه لازم آخد ماما ونروح نبارك لها ( لاحظ أن عواطف لسه امبارك حاكيه لعنايات عن خناقه محسن بسبب ولادة سناء ، لكن الظاهر نسيت:nam: ، معلهش كترخير الدماغ خصوصا وان عنايات ما بتدقش و بتفوت كتير ... الدنيا علمتها كده ..!! ) .
عنايات : طب مش عايزانى اساعدك فى حاجه ؟
عواطف : كتر خيرك ، أقولك لفى خدى قشري لي شوية بطاطس وقطعيها صوابع ، ولو انى مش عارفه هقليها بأيه ؟ محسن نسى يجيب التموين امبارح ..!!
عنايات : عنيه يا حبيبتى .
تتجه عواطف الى المطبخ وتاتى بكيس البطاطس ثم تفتح الباب وتبوس عنايات بوستين الصباح ويبدأ الحوار ، وطبعا ما أجمل و اطعم حوار السلالم بالنسبه لعواطف وعنايات وبالنسبه لأغلب الستات ..!!
واثناء الحوار تتذكر عواطف ماما نونه ومشوار سناء ، فتستأذن من عنايات وتتجه الى الموبايل مسرعة ، فتجد ماما نونه وقت ارسلت اليها العديد من رسائل ( كلمنى شكرا ) فضلا على عشرات المزدات ..!!
تسارع عواطف بالاتصال بوالدتها ، ويبدأ الحوار :
عواطف : ايوة يا ماما ، انا آسفه اتأخرت عليكى ..!
ماما نونه : انت يا بت ما عندكيش دم ؟:yst7lf: ادينى ساعه بديكى فى رنات كنت فين ، اوعى تكونى نمت تانى ، مانا عرفاكى خم نوم زى ابوكى ..!!
عواطف : نمت ايه بس يا ماما ، انا كنت بكلم عنايات .
ماما نونه : قطيعه ، عايزه ايه عنايات ؟
ويبدأ الحوار من جديد ...ألخ ..!!
ونترك عواطف وماما نونه ، ونرجع لأخونا الاستاذ محسن يا ترى الدنيا ماشيه معاه ازاى ، واخبار الشغل :yd7k:.. و الاهلى .. والعلاوه معاه ايه ؟؟؟!!

****************

هذا ما سنعرفه قريبا باذن الله تعالى ...!!

[aiman 2005]

حكاية محسن أفندى
الفصل الخامس

وصل اخونا الاستاذ محسن الى محطة الاتوبيس، ووجد أمة لا اله الا الله واقفه على المحطه منتظره الاتوبيس ، محسن يحدث نفسه : ايه الزحمه دى كلها هو النهارده ايه ؟ اه .. النهارده عشره ميعاد قبض المعاشات ، احسن حاجه الواحد يكبر دماغه ويبعد عن البهدله وياخد تاكسى ،
محسن مناديا : تاكسى
سائق التاكسى : ايوه يا باشا
محسن : وسط البلد ؟
السائق : عشره جنيه
محسن : ماشى بس خلصنى
يركب محسن بجوار سائق التاكسى ، وراديو التاكسى شغال.. برنامج ( همسة عتاب )
سائق التاكسى : يا نهار ابيض يا جدع ، الدنيا بقت غريبه قوى ..!
محسن : ايه الموضوع ؟!
سائق التاكسى : الراجل مش عارف يدفن أبوه :yrfd:..!
محسن : ازاى
سائق التاكسى : مش عايزين يطلعوله شهاده وفاه غير لما يجيب شهاده الميلاد ..!
محسن : وشهاده الميلاد فين ؟
سائق التاكسى : مع ابوه
محسن : طب ما يجيبها منه ؟
سائق التاكسى : ما أبوه هو اللى مات ومش لاقيين الشهاده ..!
محسن : يمكن عند والدته ، ولا حد من اخواته ؟
سائق التاكسى : والدته ماتت من سنتين
محسن : ودفنوها :yd7k:؟
سائق التاكسى : أه ، ما دى لحقت ونفدت قبل القانون الجديد .
محسن : القانون ال ايه ؟
سائق التاكسى : القانون الجديد
محسن : هو حتى الموت عملوله قانون جديد ؟ مش كفايه قانون الايجار الجديد ...!! الشاب فى الاول كانت مشكلتة شقه واحده؟ :yst7lf:دلوقتى اصبحت مشكلة الشقه كل خمس سنين ويمكن أقل .
الراجل مش عارف لما يموت ومدة العقد تنتهى ، العيال هتروح فين ؟!!
سائق التاكسى : لأ وكنا زعلانين وبنقول بكره العيال تخلص دراسه وتقعد فى البيت :nam:، وحياتك حتى البيت دلوقتى مش هيلاقوه علشان يقعدوا فيه ..!
يعنى الواحد بعد ما يموت العيال تتشرد ..!
محسن محدثا نفسه : الله يرحمك يابا ، الشقه ايجار قديم بخمسه جنيه ونص , الحمد لله مصطفى مش هيتشرد ..!
سائق التاكسى : بص يا باشا وجوه الناس عامله ايه ؟ بص القرف اللى على وشوشهم ..!!
محسن : وده من ايه ؟
سائق التاكسى : من ايه ، هو البيه مش مالبلادى ولا ايه ؟
محسن : لأ ، انا من شبرا ..!
سائق التاكسى : عارف يا بيه ، مين المستفيد الوحيد من قانون المده ده ؟
محسن : مين ، المالك ؟
سائق التاكسى : مالك مين ؟ المالك الفلوس اللى بياخدها من المستأجر بيصرفها بعد ما يخلص مدة العقد على الشقه ..!! المستأجر بينتقم من الشقه قبل ما يسيبها ..!!
محسن : أمال مين ؟
سائق التاكسى : الجماعه العرباجيه والنجارين هما اللى مستفادين من المشوار ده ، بص يا بيه العرباجيه مش ملاحقين ،:yd7k: ينزل موبليا من الشقه دى يوديها على دى , وياخد من هنا يودى هناك ، وطبعا الموبليا من كتر الشيل و الحط بتتبهدل والحق هات نجار يظبتها ...!!
محسن : وهى الحكومه مش عارفه الكلام ده ؟!
سائق التاكسى : حكومه ..!! يا استاذ وحياة النبى انت من البلد دى ؟!!
محسن : يا عم انت هتشككنى فى نفسى ..!! شايفنى راكب فيل ولا لابس عقال ؟! انا من شبرا ابا عن جد ..!
سائق التاكسى : طب أمال ايه حكايه الحكومه دى:yrfd: ؟ من امتى الحكومه فاضيه للناس ؟ طب دى حتى العلاوة اللى واجعين دماغنا بيها بتيجى على الناس بالخراب ..!!
محسن : ايه الزحمه اللى هناك دى ؟
سائق التاكسى : مش عارف ، اظاهر فيه حادثه ولا حاجه ، استنى لما أسأل الامين .
سائق التاكسى موجه كلامه لأمين الشرطه : صباح الفل ، هى ايه الحكايه ؟
أمين الشرطه : لأ ، دول الجماعه بيمثلوا فيلم .
سائق التاكسى : بيمثلوا ..:yrfd: طيب ، يعنى مش هانعرف نعدى ؟!
أمين الشرطه : خد يمينك وادخل من شارع الجلاء .
محسن : والنبى شد حيلك شويه ، اتأخرت عن ميعاد الشغل ، وده وقت تمثيل ده ، حاجه تقرف.!
سائق التاكسى : يا عم ناس هايصه وناس لايصه ؟ اياك العالم ده هيبص لعلاوه ؟! انت ما سمعتش على بتاعت الواوا:mlak: ، بيقولوا الفرح بتاعها اتكلف خمسه وخمسين مليون دولار ..!!
المهم فيها ايه غير كل الستات ، والله يا بيه ولا حاجه ، اهو شويه لبس عريان ، والبركه فى الشد و السليكون ..!!
يا بيه : هو السليكون ده مش كنا بنعمل بيه الكوره زمان ؟!!
محسن : لأ دى الكله ، كنا بنعمل زمان الكوره من الكله ، االلى بيشموها دلوقتى ..!!
سائق التاكسى : والله يا بيه ايام رهريط ..!! ما شفنهاش قبل كده .. ربنا يعديها على خير، لأ :yst7lf:واللى طلعولنا فيه اليومين دول التحرش .
محسن : الشاب بيوصل اربعين سنه ولا شغله ولا مشغله :nam:، وبعدين يقلوله روح اعمل مشروع ، مشروع ايه اللى ها يعمله ؟ :nam:من كتر المشاريع اللى فى البلد ؟ اذا كانت الحكومة بتبيع المشاريع ..!!
سائق التاكسى : يا بيه هو اللى كان عامل مشروع فى بورسعيد ، الحكومه عملت معاه أيه ؟! مش بياعوه هدومه وشحتوه العيش ..!!
محسن : انت عارف ايه سبب التحرش ده ؟
سائق التاكسى : ايه ؟
محسن : اولياء الامور ، بص البنت بتنزل الشارع لابسه ايه وعامله ازاى ؟ عايز اعرف فين والى الامر؟
سائق التاكسى : والا البنطلون الساقط اللى مبين نص .:mlak:.. ولا مؤخذه يا بيه ..!! انت عارف يا بيه البنطلون ده ولا مؤاخذه مابيلبسوش تحته حاجه خالص:3mla: ..!!
محسن : لا حول ولا قوة الا بالله ..!! على يمينك والنبى يا اسطى .
ينزل محسن من التاكسى ويتجه مباشرة الى مقر عمله ، ويصعد الى مكتبه .
يعمل محسن بقسم الارشيف باحدى المصالح الحكومية التابعة لوزارة التربية والتعليم بوسط البلد ، القسم به ثلاثة مكاتب لثلاثة موظفين ، احدهم الاستاذ محسن ، اما الآخران فهما الاستاذ عدلى خله ( رئيس قسم الارشيف ) والاستاذ مجدى مراد صديق محسن منذ ايام الدراسه .

*****************
الناس دى قاعده بتعمل ايه فى المكاتب .. وبتشتغل ايه .. وبتحكى فى ايه ...هذا أمر شرحه يطول وأنا الليلة مشغول ...!!

[aiman 2005]

حكاية محسن أفندى

الفصل السادس

محسن يدخل الى غرفة المكتب ، قائلا : صباح الخير يا استاذ عدلى ، ازيك يا ابو الامجاد ؟
الاستاذ عدلى (وهو يقرأ الجريده اليوميه ) : صباح الخير يا محسن ، اتأخرت ليه ؟
محسن : المواصلات النهارده زحمه ، اضطريت آخد تاكسى :yrfd:..!!
مجدى : شفت الماتش امبارح يا محسن ، الاهلى ما كانش كويس ، الجدع اللى اسمه جوزيه ده ابتدى يخرف ..!!
محسن : كويس اهم كسبوا وخلاص ..!
مجدى : بس النتيجه برضه تخوف ، مش كده يا استاذ عدلى
الاستاذ عدلى : ربنا يستر الاهلى فعلا ما كانش قد كده .!
محسن : شربتوا الشاى ؟!
الاستاذ عدلى : مستنينك ( يضغط الاستاذ عدلى على جرس المكتب ) يدخل منعم الساعى المكتب .
الاستاذ عدلى : روح يابنى هات لنا شاى .
منعم وهو ينظر الى مكتب الاستاذ محسن : هو الاستاذ محسن شرف ؟!
ينظر محسن اليه ولا يعلق ..! ويخرج منعم لاحضار الشاى .
مجدى : فى اخبار عن العلاوه يا استاذ عدلى ؟
الاستاذ عدلى وهو لازال يقرأ الجريده : والله كاتبين عنوان بيقول هتكون 20% ، تقرأ اللى تحتيه ما تفهمش منه ولا كلمه ..!!
الاستاذ عدلى و يبدو أنه قد بدء فى حل الكلمات المتقاطعه : :nam:عاصمة ماليزيا ايه يا محسن ؟
محسن : كام حرف ؟!
الاستاذ عدلى :ايه ده كله ؟ حوالى 11 حرف ..!!
محسن : كوالا لامبور .
الاستاذ عدلى : جدع يا محسن ، عرفتها ازاى دى ؟!!
مجدى : يعنى انت مش عارف محسن يا استاذ عدلى ، موسوعه بمعنى الكلمه ..!!
يدخل منعم بالشاى : الشاى يا أفنديه .
ويبدء الجميع فى شرب الشاى ، وقبل ان ينصرف منعم
مجدى : ايه يا بنى ده ، انت مش حاطط سكرفى الشاى خالص ، روح هات ملعقة سكر بسرعه .
منعم : انا حاطط معلقتين سكر زى ما بتشربه يا استاذ مجدى ، السكر هو اللى ما بيحليش ، اظاهر سكر بنجر ؟!
الاستاذ عدلى : ما تبقاش تجيب منه تانى .
منعم : ماشى الكلام ، وينصرف منعم وهو يتمتم ::yrfd: كل حاجه بيغشوها حسبنا الله ونعم الوكيل ..!!
الاستاذ عدلى : يا مجدى فى خطابين عندك هيتصدروا ، ابقى سركهم ..!
مجدى : حاضر يا استاذ عدلى ، هما فين ؟
الاستاذ عدلى : فى درج الشانون الثالث .
محسن : حاضر .!
مجدى : خلصت الجرنال يا استاذ عدلى ؟
الاستاذ عدلى : ايوه بس ما تبقاش تحل الكلمات المتقاطعة ، انا لسه ما خلصتهاش .!
مجدى : انا هابص فى الرياضه بس ..!
يدخل منعم الى المكتب قائلا : يا اخونا الى هيروح يعزى الاستاذ ممدوح ، الاتوبيس هيطلع الساعه عشره .
محسن : ما له ممدوح ؟!
مجدى : انت ما قرأتش الورقه اللى معلقه فى لوحة الاعلانات ؟ اخوه تعيش انت .
محسن : لا حول الا باله يا رب ، اخوه صلاح ؟
مجدى : ايوه ، ما هو ما عندوش اخوات تانى .
محسن : دنا لسه شايفه من يومين ومسلم عليه ؟
الاستاذ عدلى بتهكم : وهو انت يعنى لما سلمت عليه يا سي محسن عزرائيل هيخاف يقرب منه:yd7k: ؟!! ده أجل يا بنى واعمار وكل واحد له يوم .
مجدى : هو ساكن فين ؟ لسه برضه فى السيده ؟
محسن : لأ دول اشتروا حتة ارض شرك حوالى ثمانين متر وبنوها فوق فى المقطم .
الاستاذ عدلى : كام دور ؟
محسن : حوالى ثلاثه ادوار او اربعه مش فاكر، انا رحت مره واحده بس ساعة لما ممدوح عمل البواسير .!
الاستاذ عدلى : ما تعرفش يا محسن عندهم شقه فاضيه ولا لأ ؟ الواد ابن الفقريه عايز يتجوز ومش لا قيله شقه يتنيل فيها :mlak:.!
مجدى : وانت مستعجل عليه ليه ؟ ما لسه بدرى حد يروح للخيبه برجليه ؟!
الاستاذ عدلى : امه هيه اللى مطلعاها فى دماغه ...!!
( لا حظ ان الجماعه تركوا الموضوع الاساسى - وهو وفاة الفقيد الراحل صلاح - وبدءوا فى الحديث عن زواج رامز ابن الاستاذ عدلى ، ما يهمش ماهو الحى ابقى برضه من الميت ..!! )
يدخل منعم الى الحجره مرة ثانيه ، الاتوبيس جه يا افنديه . اللى هيروح يعزى يتفضل .
يهب الثلاثه مسرعين ، وكل واحد عايز يلحق مكان جانب الشباك ، ده الاتوبيس طالع المقطم وفرصه الواحد يتفرج على المبانى الجديده ..!
والاستاذ عدلى كمان يسأل مترالمبانى بكام :yd7k:، يعنى هو مش هيكون زى ممدوح أو الراحل صلاح ..!!
منعم : حساب الشاي يا أفنديه ؟
مجدى : اتنيل وهو ده وقته ، انت يا بنى ما عندكش دم ؟ ! مش شايف الناس بتموت ، بكره ان شاء الله، الحساب يجمع .
منعم : ما شى يا استاذ مجدى ، بس ابقى افتكر والنبى ، قال الحساب يجمع ، دانتوا المصلحه الوحيه اللى الحساب فيها عمره ما يجمع ، طول عمر الحساب عندكم بيطرح بس ...!!
الاستاذ عدلى : بطل دوشه يا زفت ، ابقى حاسبه يا مجدى وحياة أبوك ..! ابقى اقفل الباب كويس يا منعم .
مجدى ينظر الى منعم ولا يعلق ..!!
( لاحظ انه باعلان منعم عن وصول الاتوبيس ، وذهاب الساده العاملين لأداء واجب العزاء وتشييع جنازة المغفور له الاستاذ صلاح ، انتهى اليوم الوظيفى ،ورجع كل واحد لحال سبيله ، وطبعا اخونا مجدى ما صدرش الخطابين اللى الاستاذ عدلى قال عليهم ، مش اشكال يقعدوا لبكره:nam: ، يعنى البلد ها تخرب لو ما اتصدروش النهارده ؟!
الرزق بايت ....!!
بمجرد ان يصعد الثلاثة الى الاتوبيس يجدوا سياده المدير العام وقد جلس بجوارالشباك ايضا - يبدو انه هو الآخر يريد أن يزوج ابنه ..! - فلا يجد الاستاذ عدلى مفر من الجلوس طبعا بجواره منعا لأي ملامة أو اعتقاد خاطئ بأنه قد آثر الجلوس بجوار الشباك على شرف الجلوس بجوار سيادة المدير العام ..!
الاستاذ عدلى محدثا نفسه : يا دى المصيبه ، يعنى مش كفايه مش هقعد جانب الشباك ، لسه برضه الفقرى ده هيزنقنا بكرشه كل المشوار ده :mll:؟؟!! ، يا له مش اشكال خيرها فى غيرها ، ما هو ممدوح السكر ضاربه وشكله بيودع هو كمان ..!!
الاستاذ عدلى : صباح الخير يا سعادة المدير ، كيف أحوال جنابك ؟!!
ومن خلال العشره يعلم مجدى جيدا مدى ولوع محسن بالجلوس ايضا بجوار الشباك .! علشان كده تعود منذ ان كانا فى المرحله الاعداديه ان يترك له الشباك طواعيا لا كرها ، وحبا فى صديق العمر محسن ..!!
بدء الاتوبيس فى التحرك قاصدا هضبة المقطم من اتجاه نفق الازهر ، يرن جرس موبايل محسن معلنا ورود رساله ( كلمنى شكرا )..!
ينظر محسن الى شاشة الموبايل ، ثم الى مجدى قائلا : دى عواطف.!
مجدى : ما تتصل بيها ؟
محسن : ها تكون عايزة ايه ؟ اكيد موضوع هايف .!
يتصل محسن بعواطف ، وكل أمله الا تدخل فى الدقيقه الثانيه .!
محسن : ايوه يا عواطف ، خير ؟!
عواطف : ايوه يا محسن ، انا رايحه عند سعاد مع ماما .
محسن : ما أنا عارف ايه الجديد فى كده ؟!
عواطف : ايه الدوشه اللى عندك دى ، انا مش سامعه حاجه ..!
محسن : انا مش فى المكتب انا رايح واجب عزاء .
عواطف : يا ساتر يا رب ..!! مين اللهم أجعله خير ..!!
محسن : الحاج صلاح أخو الاستاذ ممدوح عبد الرحمن
عواطف : هو كان عيان ولا ...ألخ ..!!
محسن وخوفا من ان تدخل عواطف فى الدقيقه الثانيه : يا عواطف مش وقته ..! لما اجى ابقى احكيلك ..! مش عايزه حاجه ؟!
عواطف : لأ شكرا .
وبعد أن تغلق عواطف الموبايل تتذكر البطاطس و التموين والزيت ، عواطف يا دى الخيبه نسيت اقول له على الزيت ، يبقى يشوفوا بقى هنقلى البطاطس بايه ..:yrfd:...!!!

[aiman 2005]

حكاية الاستاذ محسن
الفصل السابع

وبعد ان انهى محسن مكالمة عواطف ، سأله مجدى : فاكر يا محسن الواد سامح موريس ؟
محسن : ياه ، وده ايه اللى فكرك بيه دلوقتى ؟ .
مجدى : فاكر لما ابوه مات ورحنا نعزيه؟ .
محسن : وهى دى تتنسى ؟ طبعا ، انا عايز اعرف انت ايه اللى خلاك ضحكت:yd7k: ؟
مجدى : ابه اللى خلانى ضحكت ..!! مش فاكر يا محسن أول ما دخلنا الصوان وقعدنا انت قلت ايه ؟!!
محسن ضاحكا : انا اول ما قعدت ، ما لقيتش ولا واحد فى الصوان غيرنا احنا الاثنين ، وقرايب سامح اللى بيستقبله العزاء .
مجدى : انا ما كنتش واخد بالى من الحكايه دى ، لقيتك بتهمس الصوان بيشغى ، ابص يمين وابص شمال :3mla: ملاقيش ولا واحد غيرنا ، بقولك ايه الحكايه ؟ رحت انت قايل يمكن ايوه لسه ما ماتش ؟..!! انا ما اتمالكتش نفسى ساعتها وضحكت خصوصا والواد سامح من ساعة ما دخلنا الصوان وعينه ما نزلتش من علينا ..!!
محسن ضاحكا : ايوه ، انت ساعتها قلت ، طيب لما ابوه لسه ما ماتش ، ما جاش العزاء ليه :yd7k:، مش كان واجب برضه يكون موجود ، على الاقل يقف جانب ابنه فى ظرف زى ده ...!!
انا سمعت الكلمه دى ، وما مسكتش نفسى ، ولو كنت جدع صحيح تسكتنى ..!
مجدى ضاحكا : شفت الواد سامح عمل بعدها ايه ؟ قام وعمل بيعزم علينا بسجائر ، وهو عارف انك ما بتشربش ، ساعتها ميل عليك وقال لك ايه يا محسن ؟!!
محسن : قالى بس يا ابن الجزمه انت وهو :yst7lf:، بطلوا فضايح ، خد الجحش اللى جانبك _ اللى هو انت يا مجدى -واتكلوا على الله ..!!
مجدى : بأه قالك كده ، بأه انا جحش يا سامح ، فاكر الواد ده كنا مسميينه ايه فى المدرسه ؟ كان الاستاذ على خلف بتاع العربى ما يقلوس الا يا بغل .
محسن : كانت ايام يا عم مجدى مش هتتعوض ، الواحد كان عايش يومه ومش عامل هم لحاجه ..!!
مجدى : الواد ده فين ايامه السوده ، صدق ادينى سنين ما شفتوش ؟!
محسن : سامح بقى دكتور تخدير .:nam:..
مجدى ضاحكا ومندهشا : تخدير ، والله دى الحاجه الوحيده اللى كان فالح فيها ..!!
يتوقف حديث الصديقان عند الاستماع الى صوت سائق الاتوبيس عاليا ، اللى معاه حاجه كده ولا كده يا افنديه يرميها ، واللى عليه حكم ينزل احنا داخلين على لجنه ، وعايزين اليوم ده يعدى على خير ..!!
يثور كل من فى الاتوبيس على كلام السائق ، ويهدأ الاستاذ عدلى الجميع ، ويوجه كلامه الى السائق : عيب يا ابنى تقول الكلام ده :yst7lf:، احنا كلنا موظفين محترمين ، ما يصحش كده ..!!
السائق : يا بيه كار السواقه ده ورانا كتير، على العموم ما تزعلوش يا أفنديه حقكم عليه ..!!
يقف الاتوبيس امام لجنة المرور ، ويصعد الامين الى الاتوبيس ويتلفت فى وجوه الموجودين وينظر ما بين المقاعد ، حنى يصل الى منعم فى آخر الاتوبيس ( الكنبه الورانيه )
أمين الشرطه : ايه اللى معاك ده ؟
منعم : ده كيلو سكر بنجر ، الاستاذ عدلى قال لى رجعه ، علشان الاستاذ مجدى قال ما بيحليش ..!!
امين الشرطه : خلاص .. خلاص
ينزل الامين من الاتوبيس ، ويقول لضابط الشرطه : كله نمام .
الضابط موجها كلامه للسائق : رخصتك .
السائق : اتفضل يا باشا .
الضابط بعد تصفحه الاوراق : مش لابس الحزام ليه ؟!!
السائق : الدنيا حر يا بيه ، والواحد مش ناقص خنقه ..!
الضابط للأمين : اعمل له وصل بخمسه وخمسين جنيه ..!
السائق : السائق يا بيه الحزام اهه انا لسه خالعه لما الاتوبيس وقف .!
أمين الشرطه : بس ياله .
ينتقل الضابط الى سيارة اخرى ، ويحاول السائق ان يثنى الامين عن تحرير الايصال بكافه الوسائل المعروفه ، بداية من المحايله :yrfd:، الى السيجارة ، وانتهاء بالعشرة جنيه ، ولكن هيهات
( ووجهة نظر الامين هنا أن العشرة جنيه حلوه واحسن من عينه وعين الضابط ، اهو يرجع للعيال بكيس فاكهه ياكلوه بالهنا و الشفا ، بس لو الباشا سأله على الايصال هيقوله ايه ؟ ، وده ضابط فقرى وما بيرحمش ) ...!!
السائق بعد ان يأس من الامر : حزام ايه وزفت ايه ، ما حنا طول عمرنا بنسوق من غير حزام ، هما كل شويه يطلعولنا بتقليعه جديده ، الله يخرب بيت ام الحكومه ..!!
الاستاذ عدلى للأمين : ما خلاص يا سيادة الامين ، المسامح كريم !.
الامين : يا استاذ والله ما ينفع ، عارف سياتك بمجرد ما انزل الضابط هيسألنى عن الايصال ، انت ما تعرفوش ،:mll: انا عارف اترمى علينا من انهى مصيبه ...!!
سيادة المدير العام : خلاص يا عدلى علشان نلحق العزاء ، كل واحد يدفع جنيه للسواق .
السائق : الله يعمر بيتك يا بيه ..!
الاستاذ عدلى : يا اخوانا كل واحد بسرعه كده يطلع جنيه ، قوم يا منعم لم الفلوس ، يا مجدى ابقى اديله جنيه ، علشان ما عيش فكه، وبكره نبقى نتحاسب ، وحياة أبوك ..!
واثناء قيام منعم بالمرور على الركاب لجمع الجنيه ، يصعد صبى الى الاتوبيس ومعه جردل حاجه ساقعه : كولا .. كولا .. كولا ببس كولا ..!!
مجدى : ايه يا بنى أحنا فى قطر ولا ايه ؟!
السائق : سيب الواد يسترزق يا بيه ..!!
ولا يجد الاستاذ عدلى مفر من فتح زجاجه كوكا كولا لسياده المدير العام .
عدلى : اتفضل يا باشا .
سيادة المدير فى وقار محاولا ان يخفى وراءه فرحته بالحاجه الساقعه : شكرا يا عدلى شكرا:mlak: , وليه التعب ده ؟!
الاستاذ عدلى : العفو العفو ده خيرك يا باشا اتفضل سيادتك اتفضل .
هذا ما اعلنه الاستاذ عدلى ، ولكن طبعا الحديث الذى سيدور فى سره مغاير تمام و لن يخلو من بعض العبارات مثل : ماطرح ما يسرى يهرى ، هو يوم اسود من اوله ، انا عارف اصطبحت بوش مين النهارده ... ألخ .. من العبارات التى تناسب الحدث ..!!
مجدى : افتح اثنين هنا يابنى .
منعم من الخلف : وانا يا استاذ مجدى ، خليهم ثلاثه يابنى والنبى ..!!
ويصعد الاتوبيس رجل مسن متظاهرا بالعمى ومعه طفله صغيره ، وتقوم الطفله بسرعة البرق وبيد مدربة :3mla: بتوزيع جزء عم على الساده الحضور ، قائله : ربنا يخليلكم ولادكم ..!!
ثم تعيد الكرة مرة اخرى لجمع ما قامت بتوزيعه على الساده الحضور ، ومعه بعض ارباع الجنيهات القليله التى احسن بها الركاب .
الاستاذ عدلى وهو يعطى البنت جزء عم ونصف جنيه :yrfd:، وقدبذل قصارى جهده لكى يرى سياده المدير العام هذه اللحظه التاريخية ، التى وان دلت على شيء انما تدل على روح الوحدة الوطنية التى يتمتع بها الاستاذ عدلى ، ويدرء الشائعة التى تسرى فى المصلحه متهمة اياه بالتعصب لأبناء ملته ..!!
المدير العام : بارك الله فيك يا عدلى ( المدير العام يعلم رقص الاستاذ عدلى جيدا ، و قد حفظ بالعشرة كل حركاته ظهرا عن قلب ، بس اهو شرب من وراه حاجه ساقعه ، بينى وبينكم جت فى وقتها ، الجو حر نار والزجاجه كانت مشبره ومنظرها مغرى ..!! )
الاستاذ عدلى محدثا نفسه : يادى المصيبه ، يعنى اتنين جنيه كاكولا أنا والبأف اللى جانبى ، وجنيه السواق ، ونص جنيه بت الكلب دى ، انا اصطبحت بوش مين النهارده ، داهيه تجحمك يا ممدوح انت و أخوك المرحوم صلاح ...!!
يبدأ الاتوبيس فى التحرك من جديد فى طريقه للمقطم ، ويتبادل الساده الحضور الاحاديث و القفشات و الضحكات ، حتى يصل بهم الى منزل الفقيد ، ينزل الجميع وقد رسم كل منهم على وجهه علامات الأسى :mlak: حزنا على المرحوم صلاح .
يستقبل الاستاذ ممدوح الساده المعزيين ، وسط عبارات ومصطلحات رتيبه و مألوفة لدى الجميع ،
( شد حيلك _ البقيه فى حياتك - ربنا يصبركم - ربنا يعزيك - ربنا يجعلها آخر الاحزان ... الخ )
والسؤال التفليدى بعد ان يجلس الجميع ، الاستاذ عدلى وهو فى شدة التأثر : ازاى حصل الكلام ده ؟! هو كان تعبان ولا حاجه ؟!
الاستاذ ممدوح : لا والله ، اامبارح فاعد بيتعشى هو ومراته و العيال وبيتفرجوا على برنامج البيت بيتك ، شاور على صدره قال لمراته انا حاسس بتعب فى الحته دى ، هاتياى كبايه ميه ، على ما قامت تجيب له الميه كان السر الالاهى طلع ،
الاستاذ عدلى : لا حول الله يا ابنى ، شدوا حيلكم ، هو ده حال الدنيا بس اللى يتعظ .
( لا حظ أن الاستاذ عدلى - أبو المواعظ - كان من شويه بيلعن سلسفيل ابو ممدوح وصلاح علشان النص جنيه اللى خيطته منه البت .. !! )
وأثناء الحديث الدائر بين ممدوح و الاستاذ عدلى ، يبدو على وجوه الجميع الاهتمام وايضا التأثر ، وربما كان ما يهم كل منهم ان يعرف الحكايه بالضبط ، علشان لما يرجع ويحكيها لأم العيال ما يهيفش فى حاجه :y7lk: ..!!

**************

سعيكم مشكور ... وذنبكم مغفور ... والى لقاء جديد ان شاء الله ...!!

[aiman 2005]

حكاية الاستاذ محسن

الفصل الثامن
عواطف : محمد ... يا محمد ، محمد
ماما نونه : ايوه يا عواطف ، بأربط الطرحه ، ما تطلعي شويه ؟ .
عواطف : لأ معلش ، يالله يا ماما بسرعه ، علشان نلحق نيجى بسرعه , مصطفى بيطلع بدرى من المدرسه اليومين دول .
ماما : طيب فطرتى ولا اجبلك ساندوتش تاكليه واحنا ماشيين ؟!
عواطف : عندك ايه ؟!
ماما : ابوكى جاب لنا الصبح شوية طعميه انما ايه ، لسه سخنه لغايه دلوقتى .:yd7k:.!
عواطف : طيب اعملى لى نص رغيف ، بس و النبى ما تتأخريش .
ماما : عنيه ، ثانيه واحده وهكون عندك .
عواطف : أه ، يا ماما ياماما .
ماما : ايوه يا عواطف ، فى أيه ؟!
عواطف : ما تنسيش تجيبى زجاحة الزيت معاكى ، بس ابقى لفيها كويس .!
ماما : يا شيخه خضتينى ، حاضر .
عواطف : هو محمد عندك ؟
ماما : لأ نزل راح كليته من بدرى .
عواطف : طيب ابقى سلمي لى عليه ، وقلى له يا ندل ما لكش اخت تسأل عليها:mlak: ؟!! ادينى حوالى شهر ما شفتوش .!
ماما : معلش ، ادعيله الامتحانات شغلاه .
( لاحظ أن هذا الحوار يتم و عواطف واقفه فى بير السلم وماما نونه فى الدور الثالث ...! )
وفى اللحظه اللى ماما نونه دخلت علشان تربط الطرحه ، وتعمل سنداوتش الطعميه لعواطف ، يدخل الحاج عبد العزيز اللذيد من باب العماره .
الحاج عبد العزيز : ده ايه النور ده ، ازيك يا بنت يا عواطف ؟!
عواطف : اهلا ازيك يا بابا ، وتعانق عواطف والدها .
بابا : ما تطلعى شويه يا بنت ؟
عواطف : معلهش يا بابا ، علشان ما نتأخرش .!
بابا : وازى الواد مصطفى صحته عامله ايه ؟ وعامل ايه فى المذاكره ؟ وازى محسن ؟
عواطف : بخير والله يا بابا ، ابقى ادعى لمصطفى وانت بتصلى الفجر ، الامتحانات على الابواب ، والواد مش عاجبنى :nam:، من ساعة ما أبوه جاب له الكمبيوتر وهو لازق قدامه ..!!
بابا : معاهش يا بنتى ، طولى بالك معاه كل العيال كده .
( يترك الحاج عبد العزيز الكيسين اللى فى ايده ، ويخرج من جيبه خمسين جنيه ) .
بابا : خدى يا عواطف ، خلى الفلوس دى معاكى .
عواطف : معايا والله يا بابا ،:mlak: محسن لسه مدينى فلوس النهارده .
بابا : كتر خيره يا بنتى ، جوزك راجل اصيل ، الله يرحم والديه ، كانوا احسن جيران و كانوا عشرة طاهرة يا بنتى .
عواطف وهى تميل وتبوس ايد عمك الحاج عبد العزيز ، شكرا يا بابا ربنا يخليك لينا .
( موضوع العشره الطاهره دى بيفكرنا ازاى كان اخونا محسن :y7lk:( روميو ) معلق عواطف من وهى لسه بنت فى اولى اعدادى ، وياما البلكونات دى شافت اشارات وتبادل جوبات وحوارات..!!
ان ما كنتش مصدق اسأل اخونا مجدى وهو يقول لك ، ماهو طبعا الصديق الصدوق وكاتم الاسرار وحجات كتير ..!! ،
وهنروح بعيد ليه بير السلم ده اللى واقفين فيه خير دليل على العشره الطاهره، وياما شاف ...؟ ،:mlak: والا بلاش عفا الله عما سلف ...!!
المهم نزلت ماما نونه وطلع بابا عبد العزيز اللذيذ ، وأكلت عواطف السنداوتش بالهنا والشفا ، قبل ما يخرجا للشارع ،
عواطف : يا ماما مش عايزين نتأخر علشان مصطفى .
ماما : انت مش عارفه بنت خالتك ، تموت فى الرغى .!
عواطف : لأ اعملى معروف يا ماما ، محسن يخرب الدنيا .! فين زجاجة الزيت :yrfd:؟!
ماما : يوه والله نسيت ، ما انت اللى سربعتينى ..! . أرجع اجبهالك ؟!
عواطف : يا ست مش وقته ..! حصل خير ،:nam: ولو انى مش هعرف اقلى البطاطس بايه ؟!!
تاكسى ... تاكسى
السائق : ايوه يا مدام
عواطف : الخلفاوى
السائق : ما شى الحال ، بس بسرعه اركبى يا حاجه :3mla:، الوقوف هنا ممنوع ..!
ماما نونه : استنى عاليه يا ابنى ، انا رجلى تعبانه .!
السائق : على مهلك يا ماما .!
تركب ماما نونه وعواطف التاكسى .
السائق : معلهش سامحينى يا أمى ، المرور دلوقتى ما بيرحمش ، الحكومة اتسعرت ، ومش عارفه تجيب فلوس منين ، كل ده علشان يلموا فلوس العلاوه .!! الله يخرب بيت العلاوه وسنين العلاوه :m7nok:..!! ده لسه ما ادوهاش و الدنيا بقت نار ، يالله الله يسامحهم ..!!
عواطف : الا يا اسطى ، معرفتش العلاوه كام السنه دى ؟
السائق : انا كان راكب معايا زبون ، اظاهر كده شغال فى امن الدوله ، علشان كان لابس نضاره سوده:y7lk: ، كان بيقول العلاوه السنه دى هتكون خمسين فى الميه ...!!!!!
عواطف : والنبى الله يبشرك بالخير ،
عواطف وقد تهلل وجهها ، سامعه يا ماما ، الاسطى بيقول العلاوه خمسين فى الميه ، والنبى لو كان الكلام ده صحيح لأحليلك بقك ...!!
ماما : والنبى يا أبنى ، ما تعرفش علاوةالمعاشات ، هيدوهم كام ؟!
السائق:y7lk: وقد شعر للحظه بأنه بطرس بطرس غالى ( وزير الماليه المنوط له توفير الاعتمادات الماليه اللازمه لتحديد نسبة العلاوه ) : ان شاء الله هتكون زى علاوة الموظفين 50 % ..!
ماما : يسمع من بقك ربنا ، والنبى انا قلبى انشرح لك من ساعة ما ركبت التاكسى:yd7k: ، ربنا يخليلك ولادك .!
( لا حظ ان الحكومة حتى اللحظة التى دار فيها الحوار الثلاثى هذا ، لا تزال عاكفه على دراسة كيفية توفير الموارد الماليه اللازمة لصرف العلاوه ، ولم تتمكن فى هذا اليوم المشئوم الا من جمع خمسه وخمسين جنيه فقط لا غير ، طبعا انت عارفهم بتوع مين ..!! ) .
يصل التاكسى الى منزل الاخت سناء.
عواطف : بس هنا يا اسطى .
تنزل عواطف وماما من التاكسى ، وينطلق السائق وسط دعاء الحاجه ام عواطف له بطول العمر ، وسعة الرزق .!
عواطف : يا ماما زى ما اتفقنا ، مش عايزين نتأخر، محسن بيخرب الدنيا لما يلاقى مصطفى منتظر بره باب الشقه .
ماما : قولى لنفسك ..!! ، انت ما بتصدقى تشبطى انت وسناء فى الكلام ، وهاتك يا رغى ، ودى راحت ... ودى جت ..!!
تدق عواطف جرس الباب ( لاحظ انسناء ساكنه فى الدور الخامس ) ، يفتح كمال زوج سناء الباب .
كمال : اهلااااااااا ... ازيك يا ام مصطفى ، اتفضلى سناء فى المطبخ ، يا سناء تعالى أم مصطفى .!
سناء تخرج من المطبخ والمولود على كتفها ، اهلا يا عواطف :mlak:، امسك يا مصطفى ، يتناول مصطفى الولد ، وتتشابك سعاد وعواطف فى عناق حار .
( يدق جرس الباب )
كمال : يا ترى مين ؟!
عواطف : يوه دنا نسيت ماما طالعه على السلم .!
كمال يجرى نحو الباب لكى يظهر للجميع مدى جزعه من غلق الباب قبل ان تصعد الحاجه ام عواطف ...!!.
كمال يفتح الباب : لو مؤاخذه يا حاجه ، ما خدتش بالى .
ماما وهى تنهج من طلوع السلم : ولا يهمك يا أبنى ، قعدونى بسرعه .
سناء : اوعى يا كمال وسع لخالتى علشان تقعد .ّ
يوسع كمل ، وتجلس ماما نونه وتتعانق الاثنان .
تنظر ماما نونه الى المولود الجديد ، اخص .. اخص :mll:.. الواد ده طالع لمين ؟!! الحمد لله ما طلعتش بنت كانت بقت مصيبه:yd7k: ...!!
سناء ضاحكه : حرام عليكى ، ده زى القمر يا خالتى ، شايفه يا عواطف ، والنبى مش شبه المرحوم بابا .!
عواطف : ايوه بالضبط المرحوم ابوكى
( لاحظ ان عواطف اصلا مش فاكره خلقه المرحوم ابوه سناء ، ياله المهم تأدى الواجب اللى عليها ..! )
يدخل كمال الى المطبخ :nam:، ويهم بأن يعمل شاى لعواطف و الحاجه نونه ، تستنتج سناء ما يدور بفكر كمال ، فتستأذن من خالتها وتأتى الى المطبخ مسرعه ، قبل ما كمال يحط الغلاى على النار ،
سناء : تعالى يا كمال هات حاجه ساقعه .!
كمال : وعلى ايه الساقع ؟! ما يشربوا شاى وخلاص :yst7lf:، احنا ناقصين مصاريف ؟!
سناء : عيب يا أخى الدنيا حر:3mla: ، وفين وفين لما خالتى بتيجى هى وعواطف .!
( يحسبها كمال اكيد عواطف وامها هينقطوا سناء ، يبقى مش اشكال زجاجتين الكولا ، بدل ما يشوفوا الشاى يغيروا رأيهم ...!! بس المهم ينقطوها وانا قاعد .. بدل ما سناء تدوس فى النقطه ..! ) .
يلبس كمال شبشب فى قدمه ويستأذن من الحاجه .
كمال : بعد اذنك يا حاجه ، خمسة دقائق .!
الحاجه : يا ابنى والله ما تنزل ، ولا تتعب نفسك .
سناء : ده كلام يا خالتى ، ده احنا زارنا النبى النهارده ..!
عواطف : احنا مش عايزين نتأخر ، الواد بيبقى منتظر على السلم ,
سناء ما تخفيش يا شيخه ، بسرعه يا كمال .!
( وهنا تختلف مصلحة الزوجين ، كمال يريد ان يأتى بالساقع بسرعه ، علشان سناء ما تدوسش فى النقطه :yd7k:، وسناء تتمنى لو ان عواطف وخالتها فد جادا عليها بالنقطه اثناء ذهاب كمال لاحضار الحاجه الساقعه ...!! .
وطبعا ماما نونه وبحكم خبرتها الكبيره فى الواجبات الاجتماعيه لن تنقط سناء الا فى وجود كمال ، وما ينطبق على ماما نونه ، ينطبق بالتبعيه على عواطف ..!! .
يأتى كمال بالساقع ، وتشرب ماما نونه وعواطف وينقطوا عواطف , وتعتذر عواطف عن سر عدم حضور ابو مصطفى , وتقسم بالله انه كان مصر على الحضور معهما ، لولا الظرف الطارئ الذى حدث ( وفاة المغفور له صلاح ) ..!!
( لا حظ انه لا توجد اية علاقه تربط بين اخونا محسن والاستاذ كمال ، اللهم الا المقابلات فى الاجتماعيات الاسريه كالافراح و التعازى فقط لا غير ، و لعلك تتذكر قول محسن المأئور : انا مالى ومال اللى ولدت ...!! )
تنزل عواطف وماما نونه من عند سناء بعد ما أدوا الواجب وشربوا الساقع ، وتسأل ماما نونه عواطف : مش هاتيجى تاخدى زجاجة الزيت .
عواطف : ايوه بس مش هطلع ، اتأخرت على مصطفى . ابقى نزليهالى فى السبت
ماما نونه : حاضر .
يصلا الى المنزل وتصعد ماما نونه ، وتنتظر عواطف فى بير السلم نزول زجاجة الزيت فى السبت .
ماما نونه : يا عواطف
عواطف : ايوه يا ماما
ماما : خدى الزجاجه أهى
عواطف : لفاها كويس يا ماما؟
ماما : ايوه .
وفجأه ينقطع حبل السبت ، وتسقط الزجاجه على الارض ، وينسكب الزيت ...!!
ماما : نونه ، الحمد لله ما وقعتش عليك ، فداك ... خدت الشر وراحت , والنبى يا بنتى دى كانت آخر زجاجة زيت عندى ، ابوكى لسه ما جبش التموين ..!!
عواطف وبعد أن فاقت من حالة الزهول التى انتابتها نتيجة سقوط زجاجة الزيت : يا دى المصيبه :yrfd:، مش عارفه بقى هقلى البطاطس بايه ؟!!! محسن يبقى يتصرف!

***************
والى لقاء آخر ان شاء الله

[elraky2005]

شكرا على المجهود الرائع والقصه الجميله
ونتمنى المزيد من التألق والابداع

[aiman 2005]

شكرا على المجهود الرائع والقصه الجميله
ونتمنى المزيد من التألق والابداع

بارك الله فيكم سيادة المشرف العام
واتمنى ان تكون قصتى هذه قد نالت اعجابكم ، واعتذر عما قد تحتويه من بعض الالفاظ الدارجه :entzar:، ولكن عذرى فى ذلك انما يرجع الى اننى قد حاولت ان اجسد صورة حية لمجتمعنا المصرى البسيط بكل مميزاته و عيوبه .
كما اعتذر عن بعض الاخطاء اللغويه البسيطه ، وقد يرجع ذلك الى ما ذكرته انفا من اننى قد كتبت هذه الروايه دون اية اعداد مسبق ، انما هى افكار تتداعى و تتتابع :nshyt: .
سيادة المشرف العام ... دمتم بألف خير و سعاده .!

[ابمن نور الدين]

بارك الله فيكم ، قصة ما اروعها و اجملها ، اتمنى الاستمرار مع محسن افندى و زوجته المصون ...!!

[شمس النهار]

القصه طويله جدا بس علشان جميله كملتها كلها

بجد مجهود رائع منك يا امين

ومزيد من التقدم والرقى ان شاء الله

وتقبل منى هذا الوسام تكريما وتشجيعا لك

http://www.gmrup.com/out.php/i218644_wesaambooker.gif

[aiman 2005]

الفاضلة شمس النهار
بعد السلام عليكم
شكرا لمروركم الكريم ..:mlak:... وشكرا لوسامكم الرقيق
ودائما تقبلى تحياتى .!
أيمن ( و ليس أمين) :yd7k:

[ziiko2010]

السلام عليكم ورحمة الله وبركاته

قصة رائعة من شخصية اروع تسلم ايدك يا ايمن وننتظر منك المزيد يا جميل

http://barom11.jeeran.com/%D8%B4%D9%83%D8%B1%20%D8%B9%D9%84%D9%89%20%D8%A7%D 9%84%D9%85%D9%88%D8%B6%D9%88%D8%B9%20%D8%A7%D9%84% D8%B1%D8%A7%D8%A6%D8%B9.gif

[aiman 2005]

الفصل التاسع
ودارت الايام 000 ومرت الايام ...!!
( مصطفى ... يا مصطفى )

وحتى نعرف سر هذا الحب الذى يجمع بين محسن وصديق العمر مجدى ، لا بد وأن ترجع بنا الايام لأكثر من ثلاثين سنه فاتت ، عندما كان اليوم الاول الدراسى فى حياتهما .
- امام باب مدرسة عمر بن الخطاب الابتدائيه بشبرا يقف كل والى امر وفى يده ابنه ، منتظر ان يدق الجرس وتبدء اصعب لحظه فى حياه كل طفل ، تلك اللحظه التى ينزع والى الامر يده من يد طفله ، ويتركه وحيدا يواجه اهوال التعامل مع حضرة الناظر و الابله والداده ... ألخ .
- على باب المدرسه ، يدور الحوار التالى بين اثنين من اولياء الامور وفى يد كل منهما طفل ، وقد ارتدى المريله الكاكى ، والحذاء الاسود ، وحمل على ظهره شنطه بها كراسه وقلم رصاص و استيكه وكيس به ساندوتش جبنه بيضاء ..!
الاول : السلام عليكم
الثانى : وعليكم السلام
الاول : حضرتك ما تعرفش الجرس هيضرب الساعه كام ؟
الثانى : بيقولوا الساعه ثمانيه .
الاول : كويس علشان الواحد ما يتأخرش على ميعاد الشغل .
الثانى : هو ابن حضرتك ، داخل سنه اولى ؟
الاول : ايوه ، تعالى يا مجدى سلم على عمك .
يأتى مجدى مطأطأ الرأس ، ويسلم على عمه .
الثانى : بسم الله ما شاء الله ، وده ابن حضرتك ؟
الاول : ايوه ، محسن ، تعالى يا محسن سلم على صاحبك مجدى .
يتصافح الولدان ، وينظر كل منهما الى الآخر بترقب ، ويستمر الابوين فى الحديث و التعارف ، ويعرف كل منهما انه جار للآخر ويتفقا على ان يذهب الولدان الى المدرسه سويا فيما بعد ، وتمر قطه صغيره ، يخوفها محسن فتجرى القطه مرعوبه فيضحك الولدان وتبدء صداقتهما :yd7k:.
احب الاستاذ حسين مجدى حبا جما ، وربما يرجع ذلك لكونه الصديق الاول و الاوحد لابنه محسن ، وقد ازداد هذا الحب بعد وفاة والد مجدى ، ولم يكن مجدى قد بلغ العاشرة من عمره ، تبناه عمه حسين ، وكثيرا ما كان عمو حسين يقول متفاخرا : ان الله قد رزقه بابنان هما محسن و مجدى، واطمأنت والدة مجدى الى عائلة عمو حسين فتركت لمجدى كامل الحريه فى الاقامة مع اخيه محسن فى كنف والده عمو حسين ، خاصه بعد أن اصر أهلها على ضرورة زواجها من ابن عمها لأنها على حد قولهم لسه صغيره و الزواج ستره وعصمه..:mlak:..!.
ربما كان هذا السبب ايضا فى ارتباط مصطفى - ابن محسن - بعمه مجدى ، فلا يذهب مجدى الى صلاة الجمعه الا وبرفقته مصطفى - بالجلباب الابيض الجميل وهو يمسك يد عمه محسن - ولا يذهب مصطفى الى السينما او الاستاد الا بصحبه عمه مجدى، فبعد ان تزوجت هناء - اخت مجدى من امه - وانشغلت ببيتها و اولادها - الله يكون فى العون ..!! واصبح مصطفى هو النعمة التى انعم الله على مجدى بهاو هو سلوته وسبب فرحته .
وكما كان الحاج حسين رحمه الله يفتخر بان له ابنان ، كان مصطفى ايضا يفتخر بأن له أبوان : بابا محسن و بابا مجدى .:mlak:.!
وعندما فكر محسن فى شراء جهاز الكمبيوتر لمصطفى أصر مجدى على ان يدفع الف جنيه من جيبه الخاص - حبا فى مصطفى وابو مصطفى - وادراكا لضيق ذات يد أخونا محسن ..!
وكان مصطفى مولعا بكرة القدم - مثل ابيه وعمه مجدى ، وكان ماهر فى لعبها بشكل ملفت للنظر ، وكم تمنى ان يذهب الى اختبارات الانديه لضم البراعم الصغيرة ، ولكن محسن كان دائم الاصرار على الرفض ، خوفا على مستقبله الدراسى ..:nasy:.!!
و ائناء عوده محسن ومجدى من العمل دار بينهما الحوار التالى :
مجدى : على فكره يا محسن ، انت مزعل مصطفى ليه ؟.
محسن : مزعله ؟ !! مين اللى قال الكلام ده ؟!
مجدى : مصطفى جالى امبارح بالليل يا محسن ، وقالى يا عمو مجدى كلم بابا وحاول تقنعه ،و الله الكورة مش هاتشغلنى زى ما هما فاكرين ، انا أعرف انظم وقتى كويس ..!
محسن : تقنعنى بايه يا مجدى ، انا خايف الكورة تخليه يهمل دراسته ، الواد متفوق وانا عايزه يدخل كليه كويسه ..!
مجدى : يا سيدى ما تخفش ، ليك عليه انا هوديه النادى واجيبه ، ولو اهمل فى دراسته ابقى ما تخلهوش يروح .!
محسن : اعمل اللى تعمله يا مجدى انت برضه ابوه وادرى بمصلحته ..! ، بس والنبى ابقى كلم عواطف ، راسها و ألف سيف الواد ما يهوبش ناحية النادى ..!
مجدى : ما لكش دعوه بعواطف ، انا هاجيلكوا بعد العشاء ، وهتكلم معاها .
محسن : اللى تشوفه ، بس هاودها ،انت عارف عواطف دماغها ناشفه ..!!
مجدى : يا سيدى قلت لك ما لكش دعوه بعواطف ، انا هاجبلها البسبوسه بالقشده اللى بتحبها ، وان شاء الله كل حاجه تبقى تمام .
يفترق الصديقان على أمل اللقاء بعد صلاة العشاء
يعود محسن الى المنزل ، ويدق جرس الباب ، وتفتح له عواطف ، ويدور الحوار التالى :
محسن : السلام عليكم يا عواطف
عواطف : وعليكم السلام ، حمدلله على السلامه .
محسن الله يسلمك ، مصطفى فين ؟
عواطف : جه من المدرسه ودخل حجرته .
محسن : نام ؟
عواطف : لأ ، قال هدخل أذاكر شويه لغايه ما بابا يجى من الشغل .
محسن : لسه زعلان ؟
عواطف : انا عارفه مين اللى طلع فى دماغه حكايه الكورة دى :yst7lf: ؟!!
محسن : ربنا معاه ، لما ادخل ابص عليه .
يطرق محسن باب حجرة مصطفى ... ويفتح الباب ، مصطفى يجلس على مكتبه يذاكر دروسه ، وقد امتلأت جدران الحجرة بصور لاعبى الاهلى بداية من الخطيب و زيزو الى ابو تريكه وبركات ..!!
محسن : ازيك يا مصطفى ؟
مصطفى وقد ارتسم بعض الحزن على وجهه : اهلا يا بابا :mlak: .
محسن : اخبار ا لمدرسه ايه ؟ وعامل ايه فى المذاكره ؟
مصطفى : الحمد لله ، كله تمام .
محسن : ربنا يوفقك ، يا مصطفى انا وأمك ما لناش فى الدنيا دى غيرك ، وانت الامل اللى عايشين علشانه ، نفسى يا ابنى اشوفك حاجه كويسه ..!
مصطفى : ربنا يسهل يا بابا .
محسن يخرج من الحجره ، ويغلق الباب ثم يفتحه مرة اخرى ،
ويقول بصوت منخفض : على فكره عمك مجدى جى بالليل علشان يسهر معنا. :dtell:
يبتسم مصطفى ابتسامه عريضه ، ويفهم من ذلك ان هناك موافقه مبدئيه من عمنا محسن وان بابا مجدى قدر يقنعه ، طبعا لو ما كنش بابا مجدى اللى هيقنعه من تانى يقدر يقنعه ، وطالما بابا محسن وافق يبقى المشكله اتحلت ، خالتك عواطف دى مفيش اطيب منها ، وكلمتين من عمو مجدى هيسجدوها ، خصوصا انه هيجيب معاه اكيد البسبوسه بالقشده اللى بتحبها ..!
يدخل محسن المطبخ ....
محسن : طابخه لنا ايه يا ترى النهارده يا عواطف ؟ اوعى تكونى قاليه بطاطس ؟!!
عواطف : لأ هاقلى بطاطس بايه ، الزيت خلص وانت لسه ما جبتش التموين .:nasy: .!!
محسن : باذن الله هجيبوه الليله دى ، لأ الليله دى أيه ، ده مجدى جي يقضى معانا السهره الليله دى .
عواطف : يآنس ويشرف .
يخرج محسن من المطبخ و يتجه الى حجرة النوم ، ويبدأ فى خلع ملابسه ، ولا يجد بنطلون البيجامه !!
ينده محسن على عواطف : يا عواطف ،فين بنطلون البيجامه ؟!
عواطف : اتغسل يا محسن ، طلع واحد غيره .!.
محسن : والشبشب ؟:nam:
عواطف : لو ما كنش جانب باب الحمام ، يبقى فى البلكونه مطرح ما خلعته قبل ما تنام ..!!
يتناول الجميع طعام الغذاء ، ويأتى عمو مجدى بالمساء ومعه البسبوسه بالقشده ، وتبتسم عواطف ، وهى ترى لفة البسبوسه فى يدى مجدى :mlak:، وتدخل المطبخ لعمل الشاى واحضار الساقع.
ويقضى الجميع سهرتهم - بعد انتهاء مصطفى من واجباته الدراسيه - امام شاشة التلفاز ، واثناء تبادل الحوارات و القفشات وايضا الذكريات ، يوجه مجدى الحديث الى عواطف :3mla:
مجدى : مزعله ليه مصطفى يا ام مصطفى ؟!
عواطف : انا ازعل مصطفى ، ده هو اللى مزعلنا يا مجدى ، مش عارفه مين اللى مطلع فى دماغه موضوع الكورة ده ؟ يقطع الكورة وسنين الكورة ؟ احنا هناخد بالنا مالكورة ولا للمذاكره ، مش يبص لمستقبله يا مجدى ؟ طب ورحمة ابويا لو جاب سيرة الكوره دى تانى ..:yrfd:.. ألخ ..!
يقاطعها مجدى : ما تحلفيش برحمة ابوكى يا أم مصطفى ، ابوكى الله يرحمه لو كان عايش مكانش هيرضى ابدا انك تزعلى مصطفى بالشكل ده ..!!
وبعدين الواد ماشى كويس فى المدرسه وشادد حيله ، انتم عايزين منه ايه تانى ؟!
وبعد حوار طويل وشد وجذب بين جميع الاطراف ينتهى الحوار بموافقه مبدئيه من ام مصطفى :mll: على ذهاب الكابتن مصطفى للنادى بشرط الا يهمل دراسته .!
ويقضى الجميع سهرتهم امام التلفاز فى سعاده وهناء لب و سودانى قد احضره مصطفى من حسابه الخاص ، ولعلها تكون الليلة الاسعد فى حياة مصطفى ، ومن المؤكد انها قد تكون الأسعد ايضا فى حياة اخونا محسن .:entzar: .!
{وَالَّذِينَ يَقُولُونَ رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا}

[aiman 2005]

( الفصل العاشر )

انفلونزا الخنازير

عواطف : محسن .. محسن ، اصحى يا محسن ، الساعه داخله على ثمانيه .!
محسن : طيب .. طيب ،:nam: ما تعرفيش توطى صوتك شويه ؟
عواطف : ما انت لو كنت بتصحى من اول صوت، لكن ما فيش فايده ، كل يوم لازم توجع قلبى على ما تصحى :yrfd: .!
محسن : سلامة قلبك يا طفطف ..! يا ترى مصطفى صحى ؟!
عواطف : من بدرى ، وراح مدرسته .
محسن : ربنا يبارك فيه يا عواطف ، هو ده اللى طلعنا بيه من الدنيا ، قومى اعملى لى كباية شاى ، فين الشبشب ؟!
عواطف : اكيد فى البلكونه ، مكان ما خلعته .! يا محسن انت مش هتبطل عادة حط الراديو على ودنك ، وتسيبه يوش طول الليل بعد ما تنام ؟!! صوته بيبقى مزعج ، دى حتى مره عنايات اشتكتلى ، قالت انها ما بتعرفش تنام من صوت وش الراديو بتاعك ..!
ينظر محسن الى عواطف ولا يعلق : قومى اعملى لى شاى :yst7lf:..! عنايات دى لو وقع قتيل وهيه نايمه مش هتحس، ده صوت شخيرها بيجيب أخر الشارع ؟!!
عواطف ضاحكه : طيب اتقى الله و قوم اغسل وشك :mll: .!
وبعد ان يصلى محسن فرض ربه، ويبدء فى ارتداء ملابسه وهو يشرب الشاى ، يدور الحوار التالى :
عواطف : على فكرة يا محسن ، ماما جيه تقضى اليوم عندنا النهارده ، من ساعة ما اخويا محمد خطب ، وهو مع عروسته على طول ، وما بيروحش البيت الا آخر الليل ، الله يرحمك يا بابا ، وتنخرط عواطف فى البكاء .!
محسن يربت على كتفها ، صلى على النبى يا عواطف ، هو ده حال الدنيا .!!
عواطف : دى كانت جوازة الندامه ،ابوها مصر ان محمد ياخد شقه مستقله ويقعد بعيد عن ماما .!!
محسن : ومحمد رأيه أيه ؟!
عواطف : والله محمد محتار ، مش عايز يزعل عروسته :3mla:، وفى نفس الوقت مش عايز يسيب أمه وحدها ،.!
وبعدين هو هيجيب منين ، أقل شقه تمليك النهارده بشيء و شويات ، ومش راضى بحكاية ايجار المده دى .
محسن : طبعا طالما مده بمده ، يبقى بيت ابوه اولى .
عواطف : مش كده برضه ، طيب ما تتكلم مع الحاج عبد الراضى حماه يا محسن ، وتقول له الكلام ده .!
محسن : ده كلام يا عواطف ، انا اللى اتكلم ، اقل حاجه الرجل هيقولها بينه وبين نفسه ، انت مالك ومال الموضوع ده ، أما حاجه غريبه ؟!
وطبعا انت ما ترضاليش بكده يا عواطف ..! وبعدين ده رجل باين عليه فقرى ووشه كشرى:yst7lf: .!.

عواطف : ما تنساش تجيب معاك فاكهة وانت راجع يا محسن ..!
محسن : مش كان فيه نص بطيخه فى الثلاجه ؟!:nam:
عواطف : ما مصطفى كلها بالهنا و الشفاء .
محسن : مصطفى هياكل نص بطيخه ؟!:yrfd:
عواطف : لأ ما عنيات دخلت بالليل وقعدت معايا شويه ، وكانت جايبه معاها لب وسودانى ، اضطريت اقطع لها بطيخ :mlak: .!!
محسن : بالهنا و الشفاء .! انا نازل سلامه عليكم .
عواطف : تروح وتيجى بالسلامه ، ما تنساش الفاكهه .!
محسن يعمل مش سامع وما يردش .:yd7k:.!
يتجه محسن مباشرة الى عربة عم محمود ، والجميع يتناولون وجبة الافطار
محسن : السلام عليكم
الواقفون ، وعليكم السلام
الاستاذ خليل : اهلا يا سى محسن ، ايه اخبارك ؟
محسن : بخير والله يا استاذ خليل .
احد الواقفين : يا استاذ خليل ، ايه موضوع انفلونزا الخنازير ده ؟! قال الحكومه عامله القصه دى علشان ترخص اللحمه :nam: ؟!
الاستاذ خليل : يا جدع ما تقولش الكلام ده ، ده وباء عالمى وربنا يستر علينا .!
عم محمود : همه كل شويه يطلعولنا بحاجه جديده ، مرة انفلونزا الطيور ، ومرة انفلونزا الخنازير، ربنا يستر وما يطلعوش بانفلونزا الفول .!
محسن : دى تبقى مصيبه يا عم محمود ، ساعتها هتعمل ايه ؟!
احد الواقفين : يا اخوانا ، حد فيكوا سمع ان الاخ اوباما ده عنده انفلونزا الخنازير :nam:؟!
الاستاذ خليل : يا جدع ما تخبطش فى الحلل ..! اوعى تقول الكلام ده لحد .!
الاخ : انا سمعت الكلام ده من واحد شغال فى وزارة الصحه ، وكمان اشمعنى لما شرف بسلامته ، ظهرت اول حاله انفلونزا خنازير فى مصر ، اكيد هو السبب :yrfd:..!!
أخ تانى: هو الجدع ده جى ليه ؟!
الاخ الاولانى : يمكن الريس يقول له خليك بحبوح و فكها شويه ، علشان نوفر القرشينات بتوع العلاوه ..!
الاخ التانى : يا عم هى الحدايه بتحدف كتاكيت ؟! العالم ده اللى بيدوه باليمين لازم ياخدوه بالشمال ؟! اياك هما عبط ؟!
عم محمود : الا صحيح يا استاذ خليل بيعملوا اللانشون و البيفى واللحم المضروب ده من لحم الخنزير ، يعنى ولاد الهرمه بيوكلونا حرام فى حرام ، الله يخرب بيوتهم .!!
محسن : المصيبه السوده ، ان حتى الكوكا كولا كمان بيقولوا بتتعمل من لحم الخنزير .!
احد الواقفين : يادى المصيبه السوده ، دنا لسه خابط صاروخ كوكاكولا على الصبح قبل ما اجى افطر :yrfd: .!
الاول: صاروخ مره واحده يا مفترى ، طيب بص مناخيرك عامله ازاى ، والله عامله زى مناخير الخنزير بالضبط ..!! عارف ليه من الصاروخ اللى ضربته و ما سبتليش شويه .! ، ربنا ينتفم منك :yd7k:..!!
عم محمود : يعنى مش كفايه بيوكلونا حرام ، كمان هيشربونا حرام ؟ حسبنا الله ونعم الوكيل :nasy: .!،
الاستاذ خليل : اهو كله كلام فى الهجايص ..!
محسن : ازاى يا استاذ خليل ؟!
الاستاذ خليل : فاكرين يا جماعه من كام سنه كده ، لما الحكومة قالت البطاطس المقليه بتسبب السرطان ..! ايه اللى حصل لا الحكومة قفلت مصانع الشيبسى ، ولا الناس بطلت تقلى بطاطس . اهى كل حاجه بتاخدلها يومين، وبعدين تتنسى :nam:..!!
احد الواقفين : زى موضوع الخوزه و الحزام بتاع المرور .!
اخ تانى : برضه ما عرفناش الجدع ده ايه اللى جابه ؟ جى ليه ؟!، وقاعد يتكلم فى الدين و الاسلام و المسلمين ، هو الجدع ده مسلم ؟ ، حد فهم حاجه من كلامه ؟!. وبعدين مين القطه الحلوة اللى كانت معاه دى ، مراته ؟!:mlak:
الاخ الاولانى :لأ يا جدع مش مراته ، مراته ما جتش معاه ، انت خدت بالك ، قطه صحيح ، ، بس ربنا يستر و ما يكنش عندها انفلونزا القطط ؟! وبعدين نتعدى منها .!
الاخ التانى : نتعدى منها .! وانت هطولها منين يا معفن ، علشان تعديك :m7nok: ؟!!
الاولانى : على رأيك :sgn: ...!!
ينهى الاستاذ محسن افطاره وفى طريقه للعمل يحدث نفسه : وبعدين يا محسن فى حكاية الست ام عواطف دى ، اللى هتشرفنا النهارده ،، ما بيحلالهاش الكلام الا بعد الغداء:s7n: ، وتفضل تلت وتعجن ، وانا مش فاهم هى بتحكى فى ايه ، و ببفى نفسى اقوم انام :nam:، وطبعا ما يصحش اقوم انام وهى قاعده ، عواطف تزعل..!!
وبعدين ايه حكايه الفاكهه دى ؟! الله يرحم ابوكى يا عواطف يوم لما كان يحب يحلى كان يجيب عود قصب :yd7k:..!!
ياله ... اهو يوم ويعدى بالطول ولا بالعرض ..!!

*****************
ده كلام عمنا محسن ( يوم ويعدى بالطول ولا بالعرض ) لكن ايه اللى حصل فى اليوم ده ؟ والدنيا كانت عامله ازاى مع اخونا محسن ؟! :entzar:
هذا أمر شرحه يطول ، وأنا الليله مشغول ..!!

[aiman 2005]

الى لقاء قريب مع اجزاء اخرى من حكاية محسن افندى ..!!

[aiman 2005]

شكرا لكل من شارك معنا بالمتابعه او بالتعليق او بابداء الرأى الجميل ,! :mlak:

[شمس النهار]

أنا عايزه افهم هو محسن هايجيب التموين امتى بالضبط ؟؟

علشان تقلى البطاطس :yd7k:

بجد مجهود اكثر من رائع يا ايمن

شكرا لك اخى الكريم

[شمس النهار]

الفاضلة شمس النهار
بعد السلام عليكم
شكرا لمروركم الكريم ..:mlak:... وشكرا لوسامكم الرقيق
ودائما تقبلى تحياتى .!
أيمن ( و ليس أمين) :yd7k:


يا عم مادققش اوى كده

كلها اسامى

[aiman 2005]

أنا عايزه افهم هو محسن هايجيب التموين امتى بالضبط ؟؟

علشان تقلى البطاطس :yd7k:

بجد مجهود اكثر من رائع يا ايمن

شكرا لك اخى الكريم

الكارثه انه بعد ما عمنا محسن يجيب الزيت ، عواطف
تكتشف انه مفيش اصلا بطاطس ...!!:entzar:

[مصطفى رشيدى]

والله انتاتعبت نفسك على الفاضى عارف ليه لان مفيش حد هيخش الصفحه دى سورى الحقيقه مره